Biznes lideri Napoleon Hill

    Məşhur yazıçı, jurnalist, hüquqşünas, uğurlu sahibkar, jurnal naşiri Napoleon Hill 1883-cü il 26 oktyabrda ABŞ-ın Vircinya ştatında anadan olub. Şəxsi inkişaf və uğur sahəsində peşəkar lektor olan Hill eyni zamanda ABŞ prezidenti Teodor Ruzveltin də məsləhətçisi və nitq yazarı olmuşdur.

     “ Əgər insan bir şeyi düşünə bilir və inanırsa, ona nail ola bilər”, - fikri Hilin əsas şüarı olub. “The Law of Success”(Uğur qanunu (1928)), “Think and Grow Rich” (Düşün və varlan (1937)), “The Magic Ladder To Success”(Uğurun sehrli nərdivanı (1930)) kimi bir çox kitabları ona dünya şöhrəti qazandırmışdır.

    Napoleon Hili mübahisəsiz biznes və şəxsi inkişaf kitablarının “ulu babası” adlandırmaq olar. O, şəxsi inkişaf sahəsində ən təsirli insanlardan hesab olunur. “Düşün və Varlan” kitabı milyonlarla insanın, o cümlədən, W.Celement Stone və Og Mandino kimi bir çox uğurlu insanların həyatına mühüm təsiri olmuşdur. Məşhur “Business Week” jurnalında “Düşün və Varlan” kitabı nəşrindən 70 il sonra 6-cı ən çox satılan bzines kitabı kimi göstərilmişdir.

    Hill çətin bir həyat yolu keçmişdir. 10 yaşında ikən anasını itirir və bundan iki il sonra atası yenidən evlənir. Yazıçılıq karyerasına 13 yaşında kiçik şəhər qəzetində müxbir olaraq başlayan Hill sonradan ABŞ-ın ən sevimli motivasiya yazıçısı olur. O, ömrünün 25 ilini insanların maliyyə sahəsində uğursuzluğa düçar olması və xoşbəxt bir həyata sahib olmamalarının səbəbini araşdırmışdır. Bu müddətdə o, bir vəkil və jurnalist olaraq böyük uğur qazanmışdı.

   Napoleon Hill 8 noyabr 1970-ci ildə Cənubi Karolina ştatında vəfat etmişdir. Bir neçə il bundan əvvəl yaradılan Napoleon Hill Fondu onun əsərlərini nəşr etdirərək bütün dünyaya yayır.

    Napoleon Hildən məşhur sitatlar:

Dürüstlük ən yaxşı siyasətdir

Ən böyük imkanın bəlkə də indi olduğun yerdədir

Mübarizəni dayandırmayan hər bir insan üçün qalibiyyət mümkündür

İnsanın xarakterində əzmkarlıq poladda olan karbon kimidir

Görmək üçün gözümüzə işıq lazım olduğu kimi təsəvvür etmək üçün də beynimizə ideya lazımdır

Edison elektrik lampasını kəşf etmək üçün 10.000 dəfə cəhd etdi. Bir neçə uğursuzluğuna görə heç vaxt ruhdan düşmə